【蘋果日報專欄】李八方：台長辭典冇清晨

【蘋果日報 2008 年 9 月 2
日李八方「隔牆有耳」專欄】開學了，天文台長林超英中文教授上身，借官方地盤大講文字學。颱風鸚鵡襲港期間，天文台預測風暴消息時講過，8 月 22
日清晨發出八號風球機會不大，結果喺上午 7 時 40 分發出，被指自打嘴巴，測錯天氣之餘，折騰上班一族。

台長曾經公開自辯，7 點幾唔算「清晨」，佢所指嘅「清晨」乃係天未光嘅「凌晨」，隨即俾人笑佢唔識中文。事隔多日，天文台長輾轉反側咗唔知幾多個清晨之後，再喺台長網誌上面公開交代「清晨
8 號波」之謎。台長搵埋公務員事務局法定語文事務部幫佢足足摷咗 11 本辭典，由 1968 年嘅《中文大辭典》到 2007
年嘅《重編國語辭典修訂本》都揭勻晒，得到嘅結論就係，台長冇錯！

網誌題為《擺事實，講道理，互相尊重，用心聆聽 —
談清晨》，林超英強烈暗示，最衰都係呢啲字典冇時準，「清晨」同「凌晨」嘅意義模稜兩可，搞到佢當日作出咗一個模稜兩可、全城扯火嘅預測。台長重申，「清晨
＝ 凌晨」有一定論據，不是完全錯誤。

不過佢唔認錯之餘，都肯改過，宣佈今後天文台嘅天氣預測都唔會再用「清晨」，實行黎明請你不要來！台長話尊重大家認為「清晨」意義模糊嘅意見，決定將「清晨」剔出天文台工作詞彙之外，此後如果要提午夜後到天亮前㖡段時間，天文台將一律採用「凌晨」。

台長呢個決定一定係好痛苦，網誌係咁寫嘅：「幾天來我沒有辯駁，因為我要做功課，搜集材料，認真學習。」林超英講到自己好似俾人批鬥咁痛苦，忿忿不平嘅心情，我見猶憐。佢強調自己唔係死不認錯，引經據典只係想證明尋求真理其實唔係「拍心口，想當然」，佢要費好多功夫、很大氣力先梳理出上述小道理。

八方理得你台長中文造詣幾咁淵博，家陣唔係比試學識嘅時候，而係台長大人嘅決定，客觀上造成點樣嘅後果。總之鑊嘢，無幾百萬都有幾十萬人俾你個「清晨」夢話玩死，你家講乜都嘥鬼氣。有意見話不如以後只用時間鐘點，咁就唔使理佢「清晨」定「瘟神」，點知台長又話遲啲先講，吊吓大家癮先。

備註：由於這晚家中網絡上不到 Blogger，故大膽嘗試通過電郵貼文，希望成功，如格式或文字有異樣，懇請見諒。


補充資料：

專欄原文、台長網誌